Kur zëri i komuniteteve të nënpërfaqësuara arrin në tryezat evropiane të politikëbërjes, lind shpresa për ndryshim të qëndrueshëm. Drejtori i organizatës sonë, z. Isak Skenderi, ishte pjesë e Takimit të Rrjeteve të Eurodiaconia 2025, mbajtur në Pragë, një forum ku u trajtuan sfidat që lidhen me varfërinë ekstreme, ndarjen ruralo-urbane dhe qasjen e pabarabartë në shërbime thelbësore.

Në këtë takim, z. Skenderi prezantoi vizionin e organizatës "Voice of Roma, Ashkali and Egyptians" për “Transformimin e vendbanimeve si një shtyllë të drejtësisë sociale”, një koncept i guximshëm që i qaset përfshirjes përmes desegregimit dhe zhvillimit të udhëhequr nga vetë komuniteti.

“Nuk mjafton të flasim për ndihmë apo integrim, duhet të rikonceptojmë rrënjësisht mënyrën se si i shohim vendbanimet e segreguara. Ato nuk janë vetëm simptoma të neglizhencës, por mund të shndërrohen në hapësira të inovacionit, dinjitetit dhe pjesëmarrjes së barabartë,” – tha ai.

Kjo qasje përtej strehimit synon të adresojë antigjpsizmin sistemik, izolimin hapësinor, dhe mungesën e qasjes në infrastrukturë e mundësi ekonomike, faktorë që përjetësojnë përjashtimin.

Faleminderit Eurodiaconia dhe Diakonie ECCB për këtë hapësirë të çmuar bashkëpunimi dhe reflektimi mbi politika gjithëpërfshirëse!